Taflen Wybodaeth Cymdeithas Adeiladu’r Principality

• Gwelwyd perfformiad cadarn gan y Principality yn 2008, gydag elw o £14.5m
• Sicrhawyd dros £822m o adneuon cynilo newydd yn 2008, gan olygu bod ein balansau cynilion manwerthu yn £4,626.5m
• Caiff dros 93% o’n benthyciadau eu hariannu gan ein balansau cynilion manwerthu
• 450,000 o gwsmeriaid; ymunodd 76,000 o gwsmeriaid newydd â’r Gymdeithas yn 2008
• 50 o ganghennau, mwy o ganghennau yng Nghymru nag unrhyw Gymdeithas Adeiladu arall
• 9fed Cymdeithas Adeiladu fwyaf yn y DU
• Gwerth £6 biliwn o asedau
• Benthyciad ar sail Gwerth cyfartalog o lai na 50% ar ein llyfr benthyca, sy’n nodi ansawdd ein llyfr morgeisi

Wedi’i sefydlu yn 1860, Cymdeithas Adeiladu’r Principality erbyn hyn yw un o sefydliadau ariannol mwyaf adnabyddus Cymru. Gyda dros £6 biliwn o asedau, ni yw’r 9fed cymdeithas adeiladu fwyaf yn y DU.

Rydym yn ymfalchïo yn y ffaith ein bod wedi cynnal ein statws cydfuddiannol cryf dros y 149 o flynyddoedd diwethaf. Mae bod yn gymdeithas gydfuddiannol yn golygu ein bod yn wahanol i fanciau sy’n gorfod bodloni eu cyfranddeiliaid. Caiff ein helw ei ail-fuddsoddi yn y Gymdeithas i greu mwy o werth a sicrwydd ariannol i’n haelodau a’n cwsmeriaid.

Yn wir, prif flaenoriaeth y Principality yw sicrhau bod arian ein haelodau yn ddiogel. Mae ein model busnes ‘cydfuddiannol’ traddodiadol yn golygu ein bod mewn safle da i oresgyn yr amodau economaidd ariannol cyfredol.

Rydym yn parhau i wneud elw, mae gennym ddigon o gyfalaf ac rydym yn y safle cryfaf yn y sector o ran cyfalaf. Mae ein hymagwedd ddoeth at fenthyca a lefelau uchel o adneuon cynilion manwerthu yn sicrhau bod ein cymhareb arian manwerthu yn parhau i fod yn un o’r rhai gorau yn y diwydiant.

Mae’r cynilion manwerthu gorau erioed yn ystod 2008, sef dros £822 miliwn, wedi golygu ein bod wedi gallu lleihau ein dibyniaeth ar ffynonellau ariannu’r farchnad cyfanwerthu a’r farchnad arian hyd yn oed ymhellach eleni.

Caiff 93% o fenthyciadau Cymdeithas Adeiladu’r Principality eu hariannu gan ein hadneuon cynilion manwerthu - ffigur rydym wedi gweithio’n galed i’w gyflawni ac yn falch iawn ohono.

Yn ogystal, ymunodd 76,000 o gwsmeriaid newydd â Chymdeithas Adeiladu’r Principality y llynedd. Mae hynny’n dyst pellach i’n brand yr ymddiriedir ynddo a’n model busnes profedig.

At hynny, mae ein hymagwedd ddoeth tuag at fenthyca wedi sicrhau nad yw’r Gymdeithas erioed wedi bod yn gysylltiedig â’r farchnad morgeisi 100% benthyciad ar sail gwerth risg uchel yn wahanol i lawer o’n cystadleuwyr.

Yn ogystal, nid yw’r Principality erioed wedi caffael llyfrau benthyca busnesau sy’n golygu bod gennym ddealltwriaeth lawn a thrylwyr o gyfansoddiad ein busnes benthyca. Mae ein holl fenthyciadau wedi tyfu’n naturiol ac wedi cael eu datblygu’n raddol dros nifer o flynyddoedd gan sicrhau bod y busnes hwn yn cael ei reoli mewn ffordd effeithiol.

Mae’r ffactorau hyn, yn eu tro, wedi arwain at sefyllfa lle mae ein hôl-ddyledion cyfredol (nifer y cwsmeriaid sy’n diffygdalu ar eu benthyciadau) yn sylweddol is na’r cyfartaledd ar gyfer y farchnad.

Mae polisi darparu’r Gymdeithas, y swm rydym yn ei neilltuo i gwmpasu dyled drwg posibl, yn seiliedig ar fodel cyfrifol sy’n sicrhau ein bod mewn sefyllfa dda os bydd amodau’r farchnad yn parhau i effeithio ar allu ein cwsmer i wneud eu had-daliadau.

Nid yw’r Principality wedi profi unrhyw golledion o ganlyniad i amlygiadau i wrthbartïon yn cynnwys banciau yng Ngwlad yr Iâ, benthyciadau ‘sub-prime’ a dyled a ddefnyddir fel gwarant.