Forrest Homes, yn datblygu cartrefi i bobl leol yng Nghaint

Sut y gwnaethom helpu

Mae Principality Masnachol wedi cefnogi Forrest Homes Limited wrth gyflawni ei ddatblygiad diweddaraf yn Triggs Farm, Goudhurst, Caint.

Mae Forrest Homes yn ddatblygwr o Gaint sy'n cael ei redeg gan deulu ac sydd â gwreiddiau yn yr ardal leol. Mae'r cartrefi a ddarperir yn rhan o ddatblygiadau bach, wedi'u dylunio'n ofalus, sy'n diwallu anghenion penodol y gymuned.

Dywedodd Gareth Redding, Uwch-reolwr Portffolio:

“Rydym yn falch iawn o barhau i gefnogi Forrest Homes wrth iddo ddarparu tai sydd eu hangen yn ddirfawr ar gyfer pobl leol yn Goudhurst. Rydym wedi adnabod y teulu ers amser maith – teulu a fu'n datblygu eiddo yn yr ardal ers blynyddoedd lawer – ac roeddem yn fwy na pharod i gymryd rhan yn y prosiect gwych hwn.”

Mwy gan Forrest Homes

Mae Goudhurst yn bentref bach poblogaidd sydd wedi'i leoli yn Nhirwedd Genedlaethol High Weald, ac mae ganddo hanes sy'n ymestyn yn ôl dros 900 mlynedd – mae ei enw yn golygu "bryn y frwydr" ac mae ei eglwys blwyf wedi sefyll ar ben y pentref ers o leiaf 1119. Mae'n rhan o ardal ddal Ysgol Cranbrook, ysgol uwchradd wladwriaethol ddethol sy'n cael ei hystyried yn uchel iawn ei pharch, sy'n ei gwneud yn lle arbennig o ddeniadol i deuluoedd. Mae'r safle ei hun ar ben y bryn, gyda golygfeydd eang ar draws y dyffryn, ac mae'r cartrefi wedi'u trefnu o amgylch cae cymunedol sydd wedi'i ddylunio'n ofalus yng nghalon y datblygiad.

Fodd bynnag, fel llawer o gymunedau gwledig, nid oes llawer o gartrefi fforddiadwy ar gael.

Mae datblygiad Forrest Homes yn Triggs Farm wedi'i gynllunio i helpu i fynd i'r afael â hyn, gyda 4 o'r 12 o gartrefi wedi'u datblygu'n benodol i'w gwerthu am bris gostyngol i brynwyr lleol, gyda blaenoriaeth yn cael ei rhoi i bobl o Goudhurst a'r ardal gyfagos.

Mae hyn yn sicrhau y bydd y cartrefi yn mynd i'r rhai sy'n byw neu'n gweithio yn y plwyf, neu sydd â chysylltiadau teuluol agos ag ef, cyn cael eu cynnig yn ehangach. Nod y datblygiad yw helpu i ddiwallu'r galw am gartrefi ychwanegol, gan gynnwys ar gyfer prynwyr tro cyntaf, teuluoedd a'r rhai sy'n dymuno symud i gartref llai yn y pentref.

Dywedodd Alex Masters, Cyfarwyddwr yn Forrest Homes:

"Rydym yn falch iawn o weithio gyda Gareth a’r tîm ehangach yn Principality. Maen nhw wedi bod yn bartneriaid cefnogol drwy gydol y gwaith adeiladu. Rydym ymhell ar y blaen i’r amserlen ar y safle hwn – sy’n beth cadarnhaol o’i gymharu â llawer o’r diwydiant adeiladu yn y DU – ond, fel bob amser, bu problemau i’w datrys ar hyd y ffordd. Mae Gareth wedi bod yn bartner ymarferol a rhesymol iawn wrth i ni ddelio â’r materion hyn. Edrychwn ymlaen at weithio gydag ef ar gynlluniau preswyl yn y dyfodol."

Edrychwn ymlaen at roi'r wybodaeth ddiweddaraf am y datblygiad yn y misoedd nesaf.