Principality yw prif noddwr Pride Cymru am y drydedd flwyddyn yn olynol

Trydydd flwyddyn y bartneriaeth yn dathlu undod a chynhwysiant

Mae Pride Cymru yn cyhoeddi mai Cymdeithas Adeiladu Principality fydd y prif noddwr am y drydedd flwyddyn yn olynol, fel rhan o gytundeb noddi’r prif lwyfan.

Mae grŵp LHDT+ nid-er-elw mwyaf Cymru, sydd eleni’n dathlu 26 mlynedd o eiriol dros gynhwysiant a chydraddoldeb, ar fin cynnal y digwyddiad penwythnos blynyddol hir-ddisgwyliedig a gynhelir o 21 Mehefin, wedi’i leoli yng Nghae Cooper, Parc Bute.

Disgwylir i'r digwyddiad poblogaidd ddenu dros 50,000 o bobl i'r ddinas, gyda'r orymdaith wrth wraidd y dathliad, gan ddod â miloedd o unigolion at ei gilydd i orymdeithio mewn undod a balchder.

Principality yn ymrwymo i gymunedau, balchder a chynnydd

Yn ddiweddar, cyhoeddodd Cymdeithas Adeiladu Principality, Cymdeithas Adeiladu fwyaf Cymru, ei hymrwymiad hirdymor i'r strydoedd mawr a’r gymuned tan o leiaf 2030. Bydd cydweithwyr Principality yn ymuno â’r orymdaith a bydd brandio’n weladwy ar draws y digwyddiad wrth i’r sefydliad barhau â’i hymrwymiad i fod yn gynghreiriad i’r gymuned LHDTC+, ac i greu cymdeithas decach.    

Mae Principality yn bwriadu cefnogi digwyddiadau Pride ymhellach ledled Cymru. Yn arbennig, dychweliad Cylchfan Enfys Hanner Marathon Caerdydd i'r digwyddiad eleni ddydd Sul 5 Hydref. Mae'r gylchfan, y mae'r rhedwyr yn ei phasio ddwywaith rhwng milltir 10 a 12, yn rhoi hwb angenrheidiol iddynt mewn awyrgylch bywiog a lliwgar.

Cynhwysiant, perthyn a chymdeithas decach

Dywedodd Vicky Wales, Prif Swyddog Cwsmeriaid Cymdeithas Adeiladu Principality: “Rydym wrth ein bodd y byddwn yn brif noddwr Pride Cymru unwaith eto. Fel busnes cyfrifol, rydym wedi ymrwymo i hyrwyddo cynhwysiant, perthyn ac eirioli dros gymdeithas decach.

Diolch i angerdd ac ymroddiad ein rhwydwaith Pride; mae cydweithwyr, eu ffrindiau a'u teuluoedd yn dod at ei gilydd yn llawn nerth ar gyfer yr orymdaith – gan greu awyrgylch anhygoel bob blwyddyn. Yn sicr, bydd eleni llawn cystal, ac rwy'n edrych ymlaen yn fawr ato!

Dywedodd Gian Molinu, Cadeirydd Pride Cymru: “Rydym wrth ein bodd yn croesawu Cymdeithas Adeiladu Principality fel noddwr ein Prif Lwyfan unwaith eto.

“Dros y tair blynedd diwethaf, mae Principality wedi gweithio'n agos gyda ni i sicrhau bod digwyddiad Pride cenedlaethol Cymru yn gallu digwydd mewn ffordd ddiogel a diddorol.

“Diolch i bawb yng Nghymdeithas Adeiladu Principality am eu hymrwymiad parhaus a'u cynghreiriaeth.” 

Dywedodd Matt Newman, Prif Weithredwr Run 4 Wales: “Rydym mor falch o barhau â'n partneriaeth â Chymdeithas Adeiladu Principality a Pride Cymru ar ddychweliad Cylchfan Enfys Principality.

“Dyma fydd y drydedd flwyddyn y bydd parth adloniant y cwrs cynhwysol yn ymddangos yn Hanner Marathon Caerdydd ac mae adborth y rhedwyr wedi bod yn wych erioed.

“Nid yn unig y mae'n symbol gwych o gynhwysiant sy'n dangos bod Hanner Caerdydd yn groesawgar i bawb, ond mae ei leoliad ar filltiroedd 10 a 12 yn helpu i ysgogi rhedwyr pan fyddant ei angen fwyaf.

“Mae Cylchfan Enfys Principality bob amser yn rhoi cymaint o fywiogrwydd a phositifrwydd, ac mae wedi dod yn ardal y mae'r rhedwyr yn edrych ymlaen at ei chyrraedd wrth iddynt gyrraedd y llinell derfyn..”